Ҳиндистоннинг Пуна шаҳрида енгил атлетика бўйича ўтказилаётган ХХ Осиё чемпионатида 43 давлатдан 1000 нафардан зиёд спортчи ғолиблик учун кураш олиб бормоқда.

Мазкур қитъа чемпионатида Ватанимиз шарафини ҳимоя қилаётган спортчиларимиз дастлабки кунги баҳсларда муваффақиятли иштирок этдилар.

Жумладан, узунликка сакраш бўйича бўлиб ўтган мусобақада тажрибали спортчимиз Анастасия Журавлева 6 м. 36 см. натижа кўрсатиб, кумуш медал совриндори бўлди. Мазкур мусобақада биринчи ўринни япониялик Саеко Окаяма (6 м. 55 см.) эгаллади.

Шу кунги дастурдан ўрин эгаллаган қолган мусобақаларда Дарья Резниченко узунликка сакраш баҳсларида 6 м. 26 см. натижа билан бешинчи ўринни эгаллаган бўлса, ядро улоқтиришда яна бир юртдошимиз Сергей Дементьев 18 м. 59 см. натижа кўрсатиб, олтинчи ўринни эгаллаш билан бирга шахсий рекордини ҳам ўрнатди. Бу каби йирик мусобақаларда биринчи бор иштирок этган ҳамюртимиз Сетора Ҳамидова 10 км. югуришда 33:59.87 натижа билан кучли бешликдан ўрин эгаллади.

Осиё чемпионатининг иккинчи куни Ўзбекистон делегациясининг хазинаси яна биттадан олтин, кумуш ва бронза медаллари билан бойиди.

Терма жамоамиз ҳисобига олтин медални баландликка сакраш мусобақасида Надия Дусанова келтирди. 190 см. баландликни забт этган Надиянинг ғалабаси шарафини Давлатимиз байроғи сарбаланд кўтарилиб, мадҳиямиз янгради. Ундан бор йўғи 2 см. кам натижани қайд этган яна бир юртдошимиз Светлана Радзивил (188 см) Осиё чемпионатининг кумуш медали билан тақдирланди. Мазкур мусобақада учинчи ўрин қозоғистонлик Марина Аитовага насиб этди.

Осиё чемпионатининг бронза медалига ўнкураш мусобақаларида Леонид Андреев (7383 очко) сазовор бўлди.