Ўзбекистон ўсмирлар терма жамоаси бош мураббийи Исломбек Исмоилов Тошкентда давом этаётган йиғин борасида ўз фикрлари билан ўртоқлашди.
“Йиғинимиз 20 августдан бошланди. Биринчи босқични Фарғонада ўтказиб, “Цементчи”га қарши ўртоқлик учрашувини ўтказдик. Тайёргарликнинг иккинчи қисмини Тошкентга кўчирдик ва 30 августга қадар давом этади.
31 августдан тайёргарликнинг учинчи қисмини Испанияда давом эттирамиз ва у ерда кичик турнирда қатнашамиз. ЖЧ олдидан Англия, Канада ва Марокашга қарши ўйнаш қўшимча куч беради. Бу ўйинлар орқали хатоларимизни кўриб оламиз. Бу эса ЖЧ олдида биз учун муҳим ҳисобланади.
Шароитларимиз аъло даражада. Илгарилари қийинчиликлар бўлган. Машғулотларга келиб ва кетиш учун икки соат вақтимизни йўқотардик. Ҳозирда барчаси жойида. Бу ўзгаришлар терма жамоа учун хизмат қилади”, - дейди Исмоилов ЎФА матбуот хизматига берган интервьюсида.
