"Пари Сен-Жермен" футболчиси Усмон Дембеле Франция терма жамоасининг навбатдаги ўйинида майдонга тушмайди.

28 ёшли вингер Украина терма жамоаси билан баҳснинг иккинчи бўлими бошланишидан олдин захирадан майдонга тушди, аммо ўйинни охиригача давом эттира олмади - 81-дақиқада Дидье Дешам уни алмаштиришга мажбур бўлди. Учрашув якунлангач, "учранглилар" устози Дембеле тизза ости пайидан олган жароҳати туфайли Франция терма жамоаси қароргоҳини тарк этишини маълум қилди.

Беллашув Франция терма жамоасининг 2:0 ҳисобидаги ғалабаси билан якунланди. Учрашувнинг 10- ва 82-дақиқаларида Майкл Олисе ҳамда Килиан Мбаппе гол уришга муваффақ бўлди.

9 сентябрь куни французлар ўз уйларида исландиялик рақибларини қабул қилишади.