"ПСЖ" бош мураббийи Луис Энрикенинг аҳволи ҳақида маълумот пайдо бўлди.
Бир неча кун аввал испаниялик мутахассис велосипеддан йиқилиб, ўмров суягини синдириб олгани маълум бўлганди.
PSG Report нашрининг таъкидлашича, 55 ёшли Энрике операциядан муваффақиятли ўтган ва аллақачон тиклана бошлаган. Қайд этилишича, мураббийнинг саломатлиги анча яхшиланган.
Ўтказилган 3 турдан сўнг "ПСЖ" 9 очко билан Франция чемпионати турнир жадвалида пешқадамлик қилмоқда.
Дам олиш кунлари Луис Энрике шогирдлари ўз майдонида "Ланс"ни қабул қилади. Ўйин 14 сентябрь куни бўлиб ўтади.













