"Барселона" Ла Лига 4-туридан ўрин олган ўйинда "Валенсия"га ҳеч қандай имконият қолдирмади (6:0). Баҳсда Фермин Лопес, Рафинья Диас ва Роберт Левандовски ўз ҳисобига дубль ёзиб қўйди. Бразилиялик ва польшалик футболчи захирадан майдонга тушганидан кейин икки марта гол уришга муваффақ бўлди, бироқ ўйиннинг энг яхши футболчиси совринини Фермин қўлга киритди. 22 ёшли испаниялик нафақат иккита гол урди, балки жамоадошлари учун иккита яққол голли вазият яратди (энг яхши кўрсаткич), шунингдек, энг кўп дриблинг (учта) амалга оширди.
Ханс-Дитер Флик жамоаси ўн очко билан Ла Лига турнир жадвалида иккинчи ўринда бормоқда. Ундан юқорида фақат Мадриднинг "Реал"и (12) жойлашган.
