Сешанба куни "Арсенал" Чемпионлар лигасида ўз юришини бошлайди. Умумий босқичнинг дастлабки турида Микель Артета жамоаси Бильбаода "Атлетик"ка қарши баҳс олиб боради. ESPN хабарига кўра, "канонирлар"га бўлажак ўйинда икки муҳим футболчи - ярим ҳимоячи Мартин Эдегор ва вингер Букайо Сака ёрдам бера олмайди.
Эдегор шанба куни "Ноттингем Форест"га қарши ўйинда елкасидаги муаммо туфайли захирага олинганди. Сака эса август ойида "Лидс"га қарши ўйинда жароҳат олганди.
Шу билан бирга, яхши янгилик ҳам бор - Вильям Салиба сафга қайтди. Ҳимоячи "Ливерпуль"га қарши ўйинда захирага олинганди ва "Форест"га қарши сўнгги ўйинни ўтказиб юборди.
"Атлетик" - "Арсенал" учрашуви 16 сентябрь куни Тошкент вақти билан соат 21:45да бошланади.













