63 йиллик қарама-қаршилик тарихига эга азалий рақиблар «Динамо» ва «Нефтчи» 20 сентябр куни Фарғонада ўзаро тўқнаш келади.

Ўзаро ўйинлар тарихи
1960 йилда ташкил топган Самарқанд клуби ва 1962 йилда ташкил этилган Фарғона жамоаси Собиқ Иттифоқ чемпионатларидан ташқари, 1992 йилдан старт олган Ўзбекистон чемпионатлари тарихида ўзаро 57 марта тўқнаш келган.

Суперлига ва Про лигадаги натижалар «Нефтчи»нинг устунлигини кўрсатмоқда. Фарғоналиклар 57 баҳснинг 39тасида ғалаба қозонган. Аксарият ғалабалар «Нефтчи»нинг 26 йиллик устози Юрий Саркисян даврига тўғри келади. 14 учрашувда «Динамо»нинг қўли баланд келган. 4та ўйинда эса дуранг қайд этилган.

2-ўриндаги «Нефтчи» сўнгги турда «Пахтакор»га мағлуб бўлди, «Динамо» эса охирги ўйинида кубок доирасида «Шўртан» устидан йирик ғалабага эришди. Фарғонада ўтадиган шанба кунги баҳс турнинг марказий учрашуви саналади.