"Манчестер Сити" спорт раҳбарияти тез орада жамоа ҳужумчиси Фил Фоден вакиллари билан учрашиш ниятида. Бу ҳақда TBR Football хабар бермоқда.
Таъкидланишича, "шаҳарликлар" 25 ёшли Фоден билан меҳнат шартномасини узайтиришни муҳокама қилишни режалаштирмоқда. Футболчининг амалдаги шартномаси 2027 йилнинг ёзида ўз ниҳоясига етади.
Фоден "Манчестер Сити" тарбияланувчиси ҳисобланади. У жорий мавсумда барча мусобақаларни қўшиб ҳисоблаганда бешта ўйинда майдонга тушиб, иккита гол урди ва иккита самарали узатмани ўз ҳисобига ёздириб қўйди.
Айни дамда "Transfermarkt" порталига кўра, Фоденнинг бозор нархи 100 миллион еврони ташкил қилмоқда.
