Лондоннинг "Арсенал" клуби марказий ҳимоячиси Вильям Салиба Мадриднинг "Реал" клубига ўтмайдиган кўринади.

Француз "қаймоқранглилар"нинг 2026 йилга мўлжалланган устувор трансфер мақсади ҳисобланган, бироқ энди келишув деярли истисно қилинган - футболчи "канонирлар" билан янги узоқ муддатли шартнома имзолашга рози бўлган. ESPN хабарига кўра, "Реал"дагилар бу хабардан ҳафсаласи пир бўлган. Мадрид гранди раҳбарияти марказий ҳимоячининг "Арсенал"да қолиш қарорини ўзининг муваффақиятсизлиги сифатида қабул қилди.

Вильям Салибанинг лондонликлар билан амалдаги шартномаси 2027 йилгача мўлжалланган, шу боис у келаси ёзда арзонлаштирилган нархда сотувга чиқарилиши мумкин эди. Transfermarkt портали 24 ёшли футболчининг нархини 80 млн еврога баҳоламоқда.