"Челси" ярим ҳимоячи Энцо Фернандесни фақат маълум бир шарт билан сотиш имкониятини кўриб чиқишга тайёр.
Аргентиналик футболчини анчадан бери Мадриднинг "Реал" клубига ўтиши билан боғлаб келишмоқда. Ёзда трансфер ойнаси очилганида ҳам аниқлик киритилмади, бироқ "қаймоқранглилар" хавбекка қизиқишда давом этмоқда. TEAMtalk хабарига кўра, "Челси" келажакда "Реал"нинг Фернандес бўйича таклифини кўриб чиқади, агар испан гранди 121 млн евродан кўпроқ тўлашга рози бўлса - айнан шунча суммага "кўклар" 2023 йил бошида "Бенфика"дан жаҳон чемпионини сотиб олганди.
Transfermarkt портали Энцо Фернандеснинг нархини 75 млн еврога баҳоламоқда. 24 ёшли футболчининг Лондон клуби билан шартномаси 2032 йилгача мўлжалланган.













