"Вильярреал" бош мураббийи Мерселино Гарсия Торал Мадриднинг "Реал" клубига қарши ўйиндаги (1:3) ҳакамлар ишидан унчалик ҳам қониқмаяпти.
Ла Лига доирасидаги уй учрашувида "қаймоқранглилар" Винисиус Жуниорнинг дубли ва Килиан Мбаппенинг аниқ зарбаси эвазига устун келди. Меҳмонлар сафида Жорж Микаутадзе ўз номини таблога ёздириб қўйди. 77-дақиқада "сариқ сувости кемаси" бир киши кам бўлиб қолди - иккинчи огоҳлантириш олган Сантьяго Моуриньо майдондан четлатилди. Кўп ўтмай "Реал" учинчи голни урди.
"Бугунги ҳакамлик менга умуман ёқмади. Ишончим комилки, Моуриньо иккинчи вазиятда сариқ карточкага лойиқ эмасди," - деди Марселино матбуот анжуманида.
"Вильярреал" 16 очко билан турнир жадвалида учинчи, "Реал" эса 21 очко билан биринчи ўринда бормоқда.
