"Vilyarreal" bosh murabbiyi Merselino Garsiya Toral Madridning "Real" klubiga qarshi o‘yindagi (1:3) hakamlar ishidan unchalik ham qoniqmayapti.
La Liga doirasidagi uy uchrashuvida "qaymoqranglilar" Vinisius Juniorning dubli va Kilian Mbappening aniq zarbasi evaziga ustun keldi. Mehmonlar safida Jorj Mikautadze o‘z nomini tabloga yozdirib qo‘ydi. 77-daqiqada "sariq suvosti kemasi" bir kishi kam bo‘lib qoldi - ikkinchi ogohlantirish olgan Santyago Mourinyo maydondan chetlatildi. Ko‘p o‘tmay "Real" uchinchi golni urdi.
"Bugungi hakamlik menga umuman yoqmadi. Ishonchim komilki, Mourinyo ikkinchi vaziyatda sariq kartochkaga loyiq emasdi," - dedi Marselino matbuot anjumanida.
"Vilyarreal" 16 ochko bilan turnir jadvalida uchinchi, "Real" esa 21 ochko bilan birinchi o‘rinda bormoqda.













