Fransiyaning «PSJ» klubi yarim himoyachisi Vitinya faoliyatini Madridning «Real» klubida davom ettirishi mumkin. El Nacional nashri bergan ma’lumotlarga ko‘ra, futbolchining agenti Jorje Mendesh Parij klubi rahbariyatidan mijozining transferi bo‘yicha «qirollik klubi» bilan muzokaralarga ochiq bo‘lishni so‘ragan.
Madridliklar agar «PSJ» rozilik bersa, portugaliyalik xavbek bo‘yicha muzokaralarni zudlik bilan boshlashga tayyor. Biroq parijliklar o‘z yulduzini 100 million yevrodan kam bo‘lgan summaga qo‘yib yubormoqchi emas.
Ma’lumot uchun, Vitinya joriy mavsumda «PSJ» safida barcha musobaqalarda 45 ta o‘yinda maydonga tushib, 7 ta gol urdi va 10 ta golli uzatmaga mualliflik qildi. Uning Parij klubi bilan amaldagi shartnomasi 2029 yilning 30 iyuniga qadar imzolangan.
