"Реал" ярим ҳимоячиси Арда Гюлерга "Арсенал" ва "Ньюкасл" каби клублар қизиқиш билдирмоқда. Умуман олганда, мадридликларнинг қишки трансфер ойнасида Гюлерни қўйиб юбориш эҳтимоли жуда кам. "Қаймоқранглилар" бош мураббийи Хаби Алонсо Гюлерни жамоанинг асосий футболчиси деб ҳисоблайди. Бу ҳақда Football Insider нашрига таяниб, Transfer News Live хабар бермоқда.

2025/2026 йилги мавсумда Арда Гюлер "Реал"нинг 10 та ўйинида майдонга тушди. Туркиялик футболчи ҳисобида учта гол ва тўртта голли узатма бор. Нуфузли Transfermarkt портали мутахассислари Гюлерни 60 миллион еврога баҳоламоқда. Гюлернинг "қаймоқранглилар" билан шартномаси 2029 йилнинг ярмигача мўлжалланган.