Каталония полицияси (Испания таркибидаги автоном ҳамжамият) Жозеп Бартомеу президентлиги даврида "Барселона" трансферлари билан боғлиқ молиявий қонунбузарликларни аниқлади. Ўшанда жамоа сафига бразилиялик Малком келиб қўшилганди.
Манбага кўра, Барселона суди ҳозирда 2018-2020 йиллар оралиғида "воситачилик операциялари"ни амалга оширишда солиқ тўлашдан бўйин товлаш кўринишидаги эҳтимолий молиявий қоидабузарликларни текширмоқда. Улардан бири Малкомнинг 2018 йил июль ойида сотиб олиш иши билан боғлиқ.
Полиция клуб ва бразилиялик футболчи ўртасидаги меҳнат шартномаси имзоланганидан кейин унинг ўзгарганини аниқлади. Биринчи келишувда даромад солиғини 50 фоиз атрофида ушлаб қолиш кўзда тутилган эди, аммо охир-оқибат солиқ хизматига камроқ пул тушган.
