Бразилия терма жамоаси бош мураббийи Карло Анчелотти юлдуз ҳужумчи Неймарга сигнал юборди. Италиялик мураббийнинг сўзларига кўра, Неймар "селесао" сафига қайтишга қодир, фақатгина яхши жисмоний ҳолатини тиклаб олса.
"Неймар бу терма жамоада ҳеч қандай муаммосиз ўзининг энг юқори даражасида ўйнай олади. У яхши жисмоний ҳолатда бўлса, сифат ва истеъдод унга нафақат Бразилия терма жамоасида, балки дунёнинг исталган бошқа жамоасида ўйнаш имконини беради," - деди Анчелотти журналистларга.
Неймар Бразилия терма жамоаси сафида сўнгги бор 2023 йилнинг октябрида майдонга тушганди. Айни пайтда 33 ёшли Неймар клуб миқёсида "Сантос" шарафини ҳимоя қилмоқда.
Эслатиб ўтамиз, Бразилия терма жамоаси 2026 йилги жаҳон чемпионати йўлланмасини қўлга киритган эди.
