Футбол — бу фақат натижа эмас, бу тарих, сабр ва садоқатдир. Шу маънода “Машъал” клуби Ўзбекистон футболи тарихида алоҳида ўрин тутади.

Муборак футболи рамзига айланган жамоа 2025 йилнинг 17 октябрь куни “Хоразм”га қарши баҳсда ўзининг 1111-расмий учрашувини ўтказади.

Бу рақам шунчаки статистика эмас — бу юзлаб футболчилар, ўнлаб мураббийлар ва минглаб муҳлисларнинг меҳнати билан ёзилган тарихдир.

Тарихга назар
“Машъал”нинг тарихий саҳифалари 1992 йилда очилган.
Ўша йили жамоа илк бор мамлакатнинг иккинчи лигасида иштирок этган.

- 1993 йили “Машъал” Биринчи лига (ҳозирги Про лига) га қадам қўйди.
- 1995 йил эса клуб тарихида янги босқич бўлди — илк бор Олий лига (Супер лига)да иштирок этиш шарафига муяссар бўлди.
- 2006 йилда “Машъал” мамлакат футболи учун катта воқеани амалга оширди — Осиё чемпионлар лигасида қатнашган илк вилоят жамоаларидан бирига айланди.

Бугунги кунга қадар “Машъал” қуйидаги кўрсаткичларга эга:

- Иккинчи лигада: 5 ўйин
- Биринчи лигада (Пролига): 412 ўйин
- Олий лигада (Суперлига): 562 ўйин
- Осиё чемпионлар лигасида: 6 ўйин
- Ўзбекистон кубоги: 125 ўйин
Жами — 1110 расмий учрашув.

Бу ўйинларда жамоа:
- 525 ғалаба,
- 199 дуранг,
- 386 мағлубият қайд этган.

Голлар статистикаси:
- Урилган голлар — 1753
- Ўтказилган голлар — 1418
- Жамғарилган очколар (кубок баҳсларидан ташқари) - 1541 очко

1111-учрашув: янги саҳифа остонасида

17 октябрь куни “Машъал” ўзининг 1111-расмий баҳсида майдонга тушади.

Шу учрашувда бир нечта тарихий воқеалар қайд этилиши мумкин:

- “Машъал”нинг 1754-голини ким уради?
- Олий лигадаги 563-ўйинда ғалаба қайд этиладими?
- Клуб олий лига доирасидаги 221-ғалабага қозона оладими?
- Ва “Машъал”нинг олий лига доирасидаги 693-голини ким киритади?

Бу саволларга жавобни стадионга ташриф буюрувчи муҳлислар билан биргаликда кузатамиз.

Қисқача статистика

Жами ўйинлар - 1110
Ғалабалар - 525
Дуранглар - 199
Мағлубиятлар - 386
Урилган голлар - 1753
Ўтказилган голлар - 1418
Жамғарилган очко - 1541.