Марокаш U-20 терма жамоаси бош мураббийи Муҳаммад Ваҳбий ёшлар ўртасидаги Жаҳон чемпионати (U-20) ярим финалида Францияга қарши ўйинда (1:1, пеналтилар — 4:3) “челленж карта”дан фойдаланган биринчи мураббий бўлди.

Баҳснинг 72-дақиқасида марокашлик футболчи рақиб жарима майдонида йиқилди, аммо ҳакам пенальти белгиламади. Бу ҳолатдан норози бўлган бош мураббий Муҳаммад Ваҳбий “челленж карта”ни ишга солди — бу янги қоида бўлиб, U-20 турнирда синов тариқасида жорий этилган: мураббий ҳакамни VAR орқали баҳсли вазиятни қайта кўриб чиқишга мажбур қила олади.

Ҳакам вазиятни қайта кўрганидан сўнг ҳам пенальти йўқлигига ишора қилиб, ўйинни давом эттиришга кўрсатма берди.

FIFAнинг бу янги қарори футбол мураббийларига баҳсли вазиятларда адолатни тиклаш учун қўшимча имконият яратади. Эндиликда мураббийлар ушбу махсус карточка орқали VARдан фойдаланиш ташаббусини ўзлари кўрсатиши мумкин бўлади.

Маълумот учун, Марокашнинг 20 ёшгача бўлган терма жамоаси 2025-йилги ёшлар ўртасидаги Жаҳон чемпионати ярим финалида Франция U-20 жамоасини мағлубиятга учратди. Асосий ва қўшимча вақт 1:1 ҳисоби билан якунланган ўйинда, ғолиб номи пеналтилар сериясида аниқланди. Унда Шимолий Африка вакиллари 5:4 ҳисобида зафар қучди.

Финал баҳси 20 октябрь куни Ўзбекистон вақти билан соат 00:00 да бўлиб ўтади. Унда Марокаш U-20 терма жамоаси Аргентина U-20 га қарши майдонга тушади.