Marokash U-20 terma jamoasi bosh murabbiyi Muhammad Vahbiy yoshlar o‘rtasidagi Jahon chempionati (U-20) yarim finalida Fransiyaga qarshi o‘yinda (1:1, penaltilar — 4:3) “chellenj karta”dan foydalangan birinchi murabbiy bo‘ldi.

Bahsning 72-daqiqasida marokashlik futbolchi raqib jarima maydonida yiqildi, ammo hakam penalti belgilamadi. Bu holatdan norozi bo‘lgan bosh murabbiy Muhammad Vahbiy “chellenj karta”ni ishga soldi — bu yangi qoida bo‘lib, U-20 turnirda sinov tariqasida joriy etilgan: murabbiy hakamni VAR orqali bahsli vaziyatni qayta ko‘rib chiqishga majbur qila oladi.

Hakam vaziyatni qayta ko‘rganidan so‘ng ham penalti yo‘qligiga ishora qilib, o‘yinni davom ettirishga ko‘rsatma berdi.

FIFAning bu yangi qarori futbol murabbiylariga bahsli vaziyatlarda adolatni tiklash uchun qo‘shimcha imkoniyat yaratadi. Endilikda murabbiylar ushbu maxsus kartochka orqali VARdan foydalanish tashabbusini o‘zlari ko‘rsatishi mumkin bo‘ladi.

Ma’lumot uchun, Marokashning 20 yoshgacha bo‘lgan terma jamoasi 2025-yilgi yoshlar o‘rtasidagi Jahon chempionati yarim finalida Fransiya U-20 jamoasini mag‘lubiyatga uchratdi. Asosiy va qo‘shimcha vaqt 1:1 hisobi bilan yakunlangan o‘yinda, g‘olib nomi penaltilar seriyasida aniqlandi. Unda Shimoliy Afrika vakillari 5:4 hisobida zafar quchdi.

Final bahsi 20 oktyabr kuni O‘zbekiston vaqti bilan soat 00:00 da bo‘lib o‘tadi. Unda Marokash U-20 terma jamoasi Argentina U-20 ga qarshi maydonga tushadi.