Ижтимоий тармоқларда Украина терма жамоаси ҳамда Лондоннинг “Челси” клуби футболчиси Михайло Мудрик такси ҳайдовчиси бўлиб ишлаяпти деган хабарлар тарқалди ва кенг муҳокамаларга сабаб бўлди. Ушбу хабар биринчи бўлиб X (собиқ Twitter) платформасида пайдо бўлди ва унда “Челси” клуби ярим ҳимоячиси янги касб танлагани айтилган эди.

Сохта хабарга ҳатто илова қилинган тасвирларда “Uber” такси иловасида “Михайло” исмли ҳайдовчи кўрсатилган бўлиб, профил расми футболчига жуда ўхшаш эди. Бироқ бу тасвирларнинг ҳақиқийлигини тасдиқловчи ҳеч қандай ишончли далил йўқ. Улар сунъий интеллект ёрдамида яратилган ёки бошқа мақсадда монтаж қилинган бўлиши мумкин.

Энг асосийси, бу миш-миш мантиққа мутлақо зид. Сабаби Мудрик Буюк Британияда олти ойга ҳайдовчилик гувоҳномасидан маҳрум этилган. Сабаби футболчи ўзининг BMW М8 автомобилида тезликни оширгани ва бошқа йўл ҳаракати қоидабузарликлари содир этган. Текширувлардан кейин маълум бўлишича, сўнгги 18 ой ичида Михайлонинг ҳайдовчилик гувоҳномасига жами 13 та жарима бали ёзилган. Навбатдаги қоидабузарлик эса автоматик равишда футболчининг ҳайдовчилик ҳуқуқидан маҳрум этилишига олиб келган.

Эслатиб ўтамиз, Михайло Мудрик допинг тестидан ўта олмагани учун вақтинча футболдан четлаштирилган. 24 ёшли вингер “Челси” сафида 2024 йил ноябридан бери майдонга тушмаган. Унинг Лондон клуби билан шартномаси 2031-йилнинг ёзигача амал қилади. Клуб уни 2023-йилда “Шахтёр”дан 100 миллион евро эвазига сотиб олган эди.