Ijtimoiy tarmoqlarda Ukraina terma jamoasi hamda Londonning “Chelsi” klubi futbolchisi Mixaylo Mudrik taksi haydovchisi bo‘lib ishlayapti degan xabarlar tarqaldi va keng muhokamalarga sabab bo‘ldi. Ushbu xabar birinchi bo‘lib X (sobiq Twitter) platformasida paydo bo‘ldi va unda “Chelsi” klubi yarim himoyachisi yangi kasb tanlagani aytilgan edi.

Soxta xabarga hatto ilova qilingan tasvirlarda “Uber” taksi ilovasida “Mixaylo” ismli haydovchi ko‘rsatilgan bo‘lib, profil rasmi futbolchiga juda o‘xshash edi. Biroq bu tasvirlarning haqiqiyligini tasdiqlovchi hech qanday ishonchli dalil yo‘q. Ular sun’iy intellekt yordamida yaratilgan yoki boshqa maqsadda montaj qilingan bo‘lishi mumkin.

Eng asosiysi, bu mish-mish mantiqqa mutlaqo zid. Sababi Mudrik Buyuk Britaniyada olti oyga haydovchilik guvohnomasidan mahrum etilgan. Sababi futbolchi o‘zining BMW M8 avtomobilida tezlikni oshirgani va boshqa yo‘l harakati qoidabuzarliklari sodir etgan. Tekshiruvlardan keyin ma’lum bo‘lishicha, so‘nggi 18 oy ichida Mixayloning haydovchilik guvohnomasiga jami 13 ta jarima bali yozilgan. Navbatdagi qoidabuzarlik esa avtomatik ravishda futbolchining haydovchilik huquqidan mahrum etilishiga olib kelgan.

Eslatib o‘tamiz, Mixaylo Mudrik doping testidan o‘ta olmagani uchun vaqtincha futboldan chetlashtirilgan. 24 yoshli vinger “Chelsi” safida 2024 yil noyabridan beri maydonga tushmagan. Uning London klubi bilan shartnomasi 2031-yilning yozigacha amal qiladi. Klub uni 2023-yilda “Shaxtyor”dan 100 million yevro evaziga sotib olgan edi.