MLS чемпионати доирасидан ўрин олган учрашувда «Нэшвилл» ўз майдонида «Интер Майами»ни қабул қилди. Беллашув Нэшвилл шаҳридаги «ГЕОДИС Парк» стадионида бўлиб ўтди ва меҳмонлар йирик ҳисобда ғалаба қозонишди — 5:2.

«Интер Майами» сафида аргентиналик юлдуз Лионель Месси хет-трик қайд этди. Шунингдек, Бальтасар Родригес ва Теласко Сеговия ҳам бир марттадан гол урди. Месси ўз ҳисобига битта голли узатмани ҳам ёзиб қўйди.

Меҳмон жамоа ҳисобни 35-дақиқада Месси орқали очди. Аммо 43-дақиқада Сэм Сарриж ҳисобни тенглаштирди, 45+6-дақиқада эса Жейкоб Шаффельбург «Нэшвилл»ни олдинга олиб чиқди. Шундан сўнг «Интер Майами» жавоб зарбасини берди: Месси (63'), Родригес (67'), яна Месси (81') ва Сеговия (90+1') голлари натижани 5:2 кўринишига олиб келди.

Бу баҳс МЛСнинг мунтазам чемпионатдаги охирги тури бўлди. Унга кўра, «Интер Майами» 34 ўйинда 65 очко тўплаб, Шарқий конференцияда 3-ўринни эгаллади. «Нэшвилл» эса 54 очко билан 6-ўринда жой олди.

АҚШ — МЛС. Мунтазам мавсумнинг 34-тури
2025 йил 19 октябрь, якшанба.
Нэшвилл (Нэшвилл) – Интер Майами (Майами) – 2:5
Голлар: 0:1 – Месси (35'), 1:1 – Сарриж (43'), 2:1 – Шаффельбург (45+6'), 2:2 – Месси (63'), 2:3 – Родригес (67'), 2:4 – Месси (81'), 2:5 – Сеговия (90+1').