"Барселона" бош мураббийи Ханс-Дитер Флик нима учун танаффусда мунтазам равишда ўзгаришларни амалга ошираётганига жавоб берди.
Шанба куни "кўк-анорранглилар" ўйин охирида Рональд Араухонинг голи эвазига "Жирона"ни мағлуб этишди (2:1). Иккинчи бўлим бошланишидан олдин Тони Фернандес ўрнига Фермин Лопес майдонга тушди. Флик жорий мавсум Ла Лигада тўққизта баҳсдан саккизтасида танаффусда камида бир нафар футболчини алмаштирди ва журналистлар мураббийдан бунинг сабаби билан қизиқди.
"Мен мураббий сифатида воқеаларга муносабат билдиришим, ўйинлар давомида қарор қабул қилишим керак. Бугун вазият шундай эдики, танаффусга ўзгартириш киритишни лозим топдик," - деди германиялик мутахассис.
