Халқаро футбол ассоциациялари кенгаши (IFAB) келаси сешанба куни видеотакрор тизими (VAR) ваколатларини кенгайтириш масаласини муҳокама қилади.
Яъни ўйин пайтида иккинчи сариқ карточка билан боғлиқ вазиятни қайта кўриш учун VAR ваколат бериш масаласи кўриб чиқилади.
Бу ташаббусга сабаб бўлган ҳолат — Чемпионлар лигаси 3-туридаги “Барселона” — “Олимпиакос” (6:1) учрашувида юз берган баҳсли эпизод ҳисобланади.
Шу учрашувда “Олимпиакос” футболчиси Сантьяго Эссе иккинчи сариқ карточка олиб майдондан чиқарилган эди. Видеотакрорлар унинг “Барселона” яримҳимоячиси Марк Касадо билан бўлган тўқнашувида жуда кичик қўл тегиниш юз берганини кўрсатди, аммо испаниялик футболчининг реакцияси швейцариялик ҳакам Урс Шнидерни қарор қабул қилишга ишонтирди.
Ҳозирги амалдаги қоидаларга кўра, VAR бу вазиятда ҳакамни экранга чақириш ҳуқуқига эга эмас эди. Бироқ келгусида ушбу қоида ўзгариши ва VAR иккинчи сариқ карточкаларни ҳам қайта кўриб чиқиш имкониятига эга бўлиши кутилмоқда.













