Xalqaro futbol assosiasiyalari kengashi (IFAB) kelasi seshanba kuni videotakror tizimi (VAR) vakolatlarini kengaytirish masalasini muhokama qiladi.

Ya’ni o‘yin paytida ikkinchi sariq kartochka bilan bog‘liq vaziyatni qayta ko‘rish uchun VAR vakolat berish masalasi ko‘rib chiqiladi.

Bu tashabbusga sabab bo‘lgan holat — Chempionlar ligasi 3-turidagi “Barselona” — “Olimpiakos” (6:1) uchrashuvida yuz bergan bahsli epizod hisoblanadi.

Shu uchrashuvda “Olimpiakos” futbolchisi Santyago Esse ikkinchi sariq kartochka olib maydondan chiqarilgan edi. Videotakrorlar uning “Barselona” yarimhimoyachisi Mark Kasado bilan bo‘lgan to‘qnashuvida juda kichik qo‘l teginish yuz berganini ko‘rsatdi, ammo ispaniyalik futbolchining reaksiyasi shveysariyalik hakam Urs Shniderni qaror qabul qilishga ishontirdi.

Hozirgi amaldagi qoidalarga ko‘ra, VAR bu vaziyatda hakamni ekranga chaqirish huquqiga ega emas edi. Biroq kelgusida ushbu qoida o‘zgarishi va VAR ikkinchi sariq kartochkalarni ham qayta ko‘rib chiqish imkoniyatiga ega bo‘lishi kutilmoqda.