“Манчестер Юнайтед” Лиссабоннинг “Спортинг” клуби ярим ҳимоячиси Мортен Юлманнни ўз сафига қўшиб олмоқчи. Бу ҳақда ТЕАМtalk нашри хабар берди.

Манбага кўра, “қизил иблислар” бош мураббийи Рубен Аморим ушбу футболчига “Спортинг”да устозлик қилган. Шунинг учун инглиз клуби 26 ёшли даниялик футболчини трансфер қилиш имкониятини жиддий кўриб чиқмоқда.

Юлманннинг шартномасида 80 миллион евролик товон пули белгиланган. Бироқ “Манчестер Юнайтед” Аморимнинг “Спортинг” билан яхши муносабатларидан фойдаланиб, бу суммани камайтиришдан умид қилмоқда. “Қизил иблислар” раҳбарияти Мортенни 60-65 миллион евро атрофидаги сумма эвазига сотиб олишни мўлжалламоқда.

Шунингдек, “Манчестер Юнайтед” раҳбарияти “Кристал Пэлас” футболчиси Адам Уортон, “Брайтон” ярим ҳимоячиси Карлос Балеба,  “Боруссия Дортмунд” аъзоси Жоб Беллингем ва “Порту” вакили Виктор Фроҳолдтнинг ўйинларини ҳам кузатиб бормоқда. Агар музокаралар ижобий якунланса, мазкур футболчилар қишки трансфер ойнасида “қизил иблислар” сафига ўтиши мумкин

Маълумот учун, Мортен Юлманн жорий мавсум “Спортинг” сафида жами 12 та ўйинда майдонга тушиб, ўз ҳисобига 1 гол ёздириб қўйган. Transfermarkt портали футболчининг қийматини 50 миллион еврога баҳоламоқда.