Хаби Алонсо "класико"даги ғалабадан сўнг ўтказилган матбуот анжуманида Винисиус Жуниор билан суҳбат ўтказишини маълум қилди. Маълумки, бразилиялик футболчи иккинчи бўлим давомидаги ўзгаришга жаҳл билан муносабатда бўлди ва майдонни тарк этганидан кейин Алонсонинг қўлини ҳам сиқиб қўймади.
Marca хабарига кўра, "Барселона" устидан қозонилган ғалабадан (2:1) сўнг "Реал" футболчилари икки кун дам олиш имкониятига эга бўлишди. Жамоа чоршанба куни машғулотларга қайтади. Ана ўшанда Алонсо билан Винисиус ўртасида суҳбат бўлиши керак.
Испания чемпионатининг навбатдаги ўйинини "Реал" 1 ноябрь куни ўз майдонида "Валенсия"га қарши ўтказади.
