Қозоғистон профессионал футбол лигаси рахбари Михаил Гурман "Актобе" клуби билан Европа лигаси доирасида Норвегиянинг "Хедд" жамоасига қарши учрашув олдидан юзаган келган муаммо ҳақида гапириб ўтди.

"Бугун телефон орқали Актобе клуби президенти Сагат Енсегенул билан суҳбат бўлди. Унинг айтишича, Норвегия ҳукумати жамоанинг ўзбекистонлик легионерлари - Тимур Кападзе ва Александр Гейнрихга виза олинишига тўсқинлик қиляпти. Бунга сабаб эса Марказий Осиё давлатлари фуқаролари учун ушбу мумлакатга кириш ҳуқуқини берувчи ҳужжатларнинг алоҳида тартиби кўрсатилмоқда. Бу факт бизни жаҳлимизни чиқарди. Футбол ҳар доим сиёсатдан ташқарида бўлиб келганку!

ФИФА, УЕФА каби халқаро ташкилотлар ҳар доим футбол учун давлатлараро алоқаларга имкониятлар яратиб келган. Аммо бу ҳолатда Норвегия ҳукумати бу ҳужжатлари билан қозоқ клубининг нуфузли евротурнирдаги имкониятларини пасайтиряпти. Айни пайтда аҳвол шундайки, ушбу спортчилар учун визалар олиш ҳали ҳам имконсиз. Клубларимизга ёрдам қўлини чўзмоқчимиз, шу мақсадда аллақачон Қозоғистон Республикасининг тегишли идораларига мурожаат қилдик. Нима бўлган тақдирда ҳам, аминманки, ушбу ёқимсиз вазият Чемпионатимиз етакчиси "Актобе"ни янада кучлироқ ўйин кўрсатишга ундайди. Улар бор кучларини майдонда кўрсатишган ҳолда, рақибга ҳеч қандай имконият қолдирмайдилар", деди Гурман.