"Ливерпуль" сардори Виржил ван Дейк "Астон Вилла"га (2:0) қарши ўйиндан кейин журналистларнинг саволларига жавоб қайтарди.

Мерсисайдликлар Премьер-лигада 4 ўйиндан бери давом этаётган мағлубиятлар сериясига чек қўйди.

"Ғалаба қозониш ва гол ўтказиб юбормаслик ҳар доим ёқимли. Аммо бу фақат битта ғалаба - дам олиш ва кейинги ўйинга эътибор қаратиш керак.

Сўнгги ҳафталарда клубимиз атрофида шов-шув кўпайиб кетди. Бу баъзи футболчиларга салбий таъсир кўрсатиши мумкин, аммо биз бирдамликни сақлашга ҳаракат қиламиз. Биз доим ғалаба қозонишни ва мухлисларни хурсанд қилишни истаймиз, аммо ҳеч қачон бунга кафолат йўқ - АПЛда рақобат даражаси жуда юқори.

Ишни давом эттириш керак. Биз ортиқча гап-сўзлардан узоқ бўлиб, эътиборни ишга қаратишимиз керак," - деди ван Дейк TNT Sports телеканалига берган интервьюсида.

4 ноябрь куни "Ливерпуль" Чемпионлар лигасида Мадриднинг "Реал" клубини қабул қилади.