"Ливерпуль" ҳужумчиси Муҳаммад Салоҳ клуб сафидаги 250-голдан сўнг ўз фикрларини билдирди. 33 ёшли футболчи шанба куни бўлиб ўтган "Астон Вилла"га қарши ўйинда биринчи бўлим сўнгида ҳисобни очди. Учрашув "қизиллар"нинг 2:0 ҳисобидаги ғалабаси билан якунланди.
"Бундай буюк клубда гол уриш - ажойиб ҳиссиёт. Мен буни ҳеч қачон оддий қабул қилмайман. Жуда бахтлиман ва ютуғимдан фахрланаман," - деди мисрлик юлдуз TNT Sports билан суҳбатда.
250 та гол кўрсаткичи Муҳаммад Салоҳга 415 та ўйинда насиб этди. Ҳужумчи 2017 йил ёзидан бери "Ливерпуль" шарафини ҳимоя қилмоқда.
4 ноябрь куни Арне Слот жамоаси ўз уйида Чемпионлар лигаси доирасида "Реал"ни қабул қилади.
