«Атлетико» ҳужумчиси Хулиан Альварес «Арсенал»га ўтиш имкониятини жиддий кўриб чиқа бошлаган.

Аввалроқ Аргентина терма жамоаси билан жаҳон чемпиони бўлган форвард «Барселона»га ўтишни истагани хабар қилинган эди. Бироқ мадридликлар 26 ёшли футболчини Каталония клубига сотмаслигини расман маълум қилди.

«Музокаралар бўлмаган ва бўлмайди ҳам. Футболчи бу қарорни тушуниб, бор кучини ишга солишда давом этади, деб ишонамиз», — дейилган «Атлетико» баёнотида.

Шу билан бирга, Мадрид клуби Альваресни «Арсенал»га 120 миллион фунтдан ортиқ маблағ эвазига сотиш имкониятини кўриб чиқишга тайёр.

The Independent маълумотига кўра, лондонликларнинг сабр-тоқати ва трансфер стратегияси уларга бу битимни амалга ошириш имконини бериши мумкин. Илгари «Атлетико»да ишлаган «Арсенал» спорт директори Андреа Берта ушбу трансферни фаол илгари сурмоқда. Бунга жамоа бош мураббийи Микель Артета ҳам қизиқиш билдирган.

Артета Альваресни «Арсенал»га етишмаётган муҳим бўлак сифатида кўрмоқда. Қайд этилишича, воситачилар футболчига испаниялик мутахассис унга ҳужумда энг қулай позицияни беришга тайёр эканини етказган.

Шунингдек, Альваресга унинг келиши жамоанинг умумий савиясини ошириши ва Чемпионлар лигасида ғолиб чиқиш имкониятини кучайтириши мумкинлиги таъкидланган.

Манбага кўра, Альвареснинг ўзи ҳам энди «Арсенал»га ўтиш ҳақида ўйлай бошлаган.

Кутилишича, «Атлетико» аргентиналик форвард учун 150 миллион евро талаб қилади. «Арсенал» эса эҳтимолий келишувга ҳужумчи Виктор Дьёкерешни ҳам қўшиши мумкин.