Альваро Кортес «Роял Антверпен»га ўтишга яқинлашган бир пайтда, «Барселона» янги марказий ҳимоячи харид қилиш бўйича ишларни тезлаштирди.

Каталония клуби ёз давомида асосан янги ҳужумчи олишга уринган ва бу позиция учун Хулиан Альварес асосий мақсадлардан бири бўлган эди. Бироқ ҳозир жамоанинг трансфер борасидаги устувор йўналиши ўзгарган.

Diario Sport маълумотига кўра, «Барселона» аллақачон янги ҳимоячи трансфери устида ишламоқда, аммо футболчининг номи ҳозирча сир сақланмоқда.

Манбада айтилишича, клуб чап оёқда ўйнайдиган, тўпни ҳимоядан сифатли олиб чиқиш ва узатмалар орқали рақиб чизиқларини ёриб ўтиш қобилиятига эга марказий ҳимоячини изламоқда.

«Барселона» спорт директори Деку ва скаутлар бўлими раҳбари Жоау Амарал мазкур номзодни анчадан буён кузатиб келмоқда. Каталонияликлар трансфер ойнаси ёпилишидан олдин келишувни якунлашни режалаштирган.

Қайд этилишича, Деку ёзги трансферлар давомида ҳам бир қатор битимларни оммавий ахборот воситаларидан сир тутган ҳолда, орқа фонда ишлаб амалга оширган.