«Эльче» сафарда «Барселона»га қарши ўйинда очко олишга эриша олмади, аммо жуда кам жамоаларга насиб этадиган ишни амалга оширди. Учрашув «кўк-анорранглилар» фойдасига 3:1 ҳисобида якунланди. Голлар Ламин Ямал, Ферран Торрес ва Маркус Рэшфорд томонидан урилди, меҳмонлар эса Рафа Мирнинг аниқ зарбаси билан жавоб қайтарди.

Қизиғи шундаки, Ханс-Дитер Флик жамоаси тўпни назорат қилиш бўйича рақибдан ортда қолди — 49% га қарши 51%. The Touchline маълумотига кўра, бу Ла Лиганинг охирги икки йилида «Барселона» билан илк марта содир бўлди — охирги бундай ҳолат 2023 йил ноябрида қайд этилган.

Бундан ташқари, Opta статистикасига кўра, «Эльче» тарихда илк бор «Барселона»ни тўпни назорат қилиш кўрсаткичи бўйича ортда қолдирган Ла Лига дебютантига айланди.