"Барселона" ҳужумчиси Роберт Левандовски "Сельта"га (4:2) қарши ўйин якунида журналистлар билан суҳбатлашди.

37 ёшли польшалик уч марта рақиб дарвозасини ишғол қилиб, баҳс қаҳрамонига айланди. Айнан у учрашувнинг энг яхши футболчиси деб топилди.

"Ғалабадан жуда мамнунмиз. "Сельта" стадионида ўйнаш ҳар доим қийин. Биринчи бўлимда рақибларга иккита оддий гол уришга имкон бердик, аммо танаффусдан кейин вазиятни назорат қилдик.

Иккинчи бўлимда Флик захирага олинишни хоҳлайсанми, деб сўради, лекин мен ҳаммаси жойида, деб жавоб бердим. Яқинда жароҳатдан тикландим - ҳозир ўзимни жуда яхши ҳис қиляпман," - дея "кўк-анорранглилар" форвардининг сўзларини келтиради Barca Universal.

Роберт Левандовски ҳисобида Ла Лиганинг жорий мавсумида киритилган еттита гол бор. У фақат Килиан Мбаппедан (13та) ортда.