Германия терма жамоаси бош мураббийи Юлиан Нагельсманн "Барселона" дарвозабони Марк-Андре тер Штеген ҳақида ўз фикрларини билдирди.

33 ёшли голкипер қиш бошида яна майдонга қайтиши мумкин, аммо унга "кўк-анорранглилар" сафида ўйин амалиёти кафолатланмаган. У январда ЖЧ-2026 сабаб янги клубга ўтиши мумкин.

"Ўтган ҳафтада Марк билан телефонда узоқ суҳбатлашдим. У ўзини яхши ҳис қилмоқда, бу энг муҳими. Қишки трансфер ойнаси ҳеч қачон осон бўлмайди. Мен "катта клубда ўйнаши керак", деб айтмаганман, энг муҳими у мунтазам ўйнаши, клуб қанчалик юқори даражада бўлишидан қатъи назар. Вазият осон эмас, энди унинг формаси ва жисмоний тайёргарлигини баҳолаш керак.

Марк ажойиб дарвозабон, ва мен ишонаманки, у ўзига мос ечим топиб, яна мунтазам ўйнашни бошлайди. Кўрамиз нима бўлар экан", - деди Нагельсманн.

Аввалроқ тер Штегенга Англия Премьер-лигасининг бир қатор клублари қизиқиш билдираётгани хабар берилган эди.