"ПСЖ" раҳбарияти душанба куни бўлиб ўтган йиғилишда жамоа дарвозабони Люка Шевальени қўллаб-қувватлашини маълум қилди.
Аввалроқ 24 ёшли дарвозабон ижтимоий тармоқда депутат Жюлен Обернинг сайловларда ўта ўнгчи "Миллий бирлашув" партиясини қўллаб-қувватламоқчи экани ҳақидаги постга лайк босган эди. Шундан сўнг Шевалье танқидлар тўлқинига дуч келди. Дарвозабон баёнот бериб, ўз ҳаракатини тасодиф деб атади ва бу сиёсий позицияга қўшилмаслигини таъкидлади. Бундан ташқари, у жамоатчиликни ўзини фашист қилиб кўрсатишга уринаётганликда айблади.
"ПСЖ"дагилар Шевальенинг баёноти самимий эканига ишонишди ва дарвозабонга ҳеч қандай санкция қўлламасликка қарор қилишди. Қайд этилишича, клуб ва футболчи ушбу эпизодни тезроқ ўтмишда қолдириб, олдинга силжишни истамоқда.
