"PSJ" rahbariyati dushanba kuni bo‘lib o‘tgan yig‘ilishda jamoa darvozaboni Lyuka Shevalyeni qo‘llab-quvvatlashini ma’lum qildi.
Avvalroq 24 yoshli darvozabon ijtimoiy tarmoqda deputat Jyulen Oberning saylovlarda o‘ta o‘ngchi "Milliy birlashuv" partiyasini qo‘llab-quvvatlamoqchi ekani haqidagi postga layk bosgan edi. Shundan so‘ng Shevalye tanqidlar to‘lqiniga duch keldi. Darvozabon bayonot berib, o‘z harakatini tasodif deb atadi va bu siyosiy pozisiyaga qo‘shilmasligini ta’kidladi. Bundan tashqari, u jamoatchilikni o‘zini fashist qilib ko‘rsatishga urinayotganlikda aybladi.
"PSJ"dagilar Shevalyening bayonoti samimiy ekaniga ishonishdi va darvozabonga hech qanday sanksiya qo‘llamaslikka qaror qilishdi. Qayd etilishicha, klub va futbolchi ushbu epizodni tezroq o‘tmishda qoldirib, oldinga siljishni istamoqda.
