Франциянинг "Лион" клуби асосий футболчиларидан бири Малик Фофанани сотишни режалаштирмаяпти. Бу ҳақда Лига 1 Plus хабар бермоқда.
Айни вақтда 20 ёшли бельгиялик вингер октябрь ойи охирида "Страсбур"га қарши ўйинда тўпиғи чўзилгани сабабли оғриқдан азият чекмоқда. Европанинг бир қатор грандлари қизиқиш билдирган Фофана январь ойида майдонга қайтиши кутилмоқда.
"Январь ойида Фофананинг сотилиши муҳокама қилинмаяпти," - деди клуб бош директори Михаэль Герлингер.
Ўша Герлингернинг қўшимча қилишича, молиявий жиҳатдан жамоанинг ишлари унчалик яхши кетмаяпти, бу эса яқин трансфер ойнасида бошқа футболчиларнинг сотилишини истисно қилмайди.
Эслатиб ўтамиз, ўтган ёзда "Лион" қарзлари туфайли қуйи лигага тушиб кетишига бир баҳя қолганди. Жамоа УЕФА ва маҳаллий футбол федерацияси томонидан берилган мажбуриятларни бажариш учун Райан Шерки ва Жорж Микаутадзени сотишга мажбур бўлди.
