Журналист Паскуале Гуарро хабарига кўра, «Наполи» раҳбарияти Антонио Конте жамоадан кетиши мумкин бўлган ҳолатда унинг ўрнини эгаллаши мумкин бўлган Тиаго Мотта билан алоқага чиққан.

«Ҳозирги кунда Антонио Контенинг душанба куни «Наполи» базасига қайтиши ҳамон катта савол остида. Томонлар ўртасидаги муносабатлар охирги кунларда бўлгани каби кескинлигича қолмоқда.

Де Лаурентис ҳеч қандай компенсация тўлашга тайёр эмас. Президент мураббийга агар хайрлашишга тўғри келса, истеъфо ҳақидаги қарорни ўзи қабул қилиши кераклигини очиқ айтган. Конте бу борада бир қарорга келиши керак. Агар у жамоага қайтса ҳам, барибир жамоа билан боғлиқ муҳим масалаларни ҳал қилиши талаб қилинади.

Шу орада «Наполи» ҳар қандай сценарийга тайёр бўлиш учун Тиаго Мотта билан гаплашган», — деб ёзади Гуарро ижтимоий тармоқларда.

Эслатиб ўтамиз, Конте А Сериянинг 11-турида «Болонья» (0:2)га мағлубиятдан кейин бир ҳафталик таътилга чиққан эди. 56 ёшли мутахассис 17 ноябрда ишига қайтиши кутилмоқда. Ҳозирча жамоа машғулотларини унинг ёрдамчиси Кристиан Стеллини олиб бормоқда.

«Наполи» чемпионат жадвалида ҳозирда тўртинчи ўринда бормоқда, клуб етакчи «Интер»дан икки очко орқада.