"Интер Майами" ҳужумчиси Луис Суарес "Барселона"даги фаолиятини эслади.
Уругвайлик футболчи 2014 йилда "Ливерпуль"дан "кўк-анорранглилар" сафига қўшилганди. Ҳужумчи каталонияликлар сафида 283 та ўйинда 195 та гол ва 113 та голли узатмага муаллифлик қилган.
"Баъзилар "Барселона"да фақат битта яхши мавсум ўтказганимни айтишади, аммо ундай эмас. Фахр билан айтишим мумкинки, у ердаги барча мавсумларим ажойиб ўтди. Эҳтимол, уларнинг баъзилари сезиларли ютуқлар йўқлиги сабабли унчалик ёрқин кўринмаётгандир, аммо мен ҳар доим яхши ўйин кўрсатганман," - деди 38 ёшли футболчи яқинда берган интервьюсида.
