Ёшлар лигасида биринчи давра ғолиби бўлган «бунёдкорчилар» мавсумнинг иккинчи қисмига ҳам пухта хозирлик кўришмоқда.

Сўнгги тўрт кун ичида ёш «қалдирғочлар» Зарафшоннинг «Қизилқум» (асосий) ва Фарғонанинг «Нефтчи» (ёшлар) жамоалари билан иккита назорат учрашуви ўтказишди. Шуни қўшимча қилиш керакки, ҳар иккала баҳсда ҳам бунёдкорчилар таркиб жиҳатдан бир қатор муаммоларга дуч келишди. Жамоамизнинг беш нафар етакчиси ёшлар терма жамоаси йиғинида иштирок этишган бўлса, бир нечта футболчилар олий таълим муассасаларига хужжат ва имтиҳон топшириш билан банд бўлдилар. Шунингдек, яна баъзи футболчилар олий лига клублари йиғинларида иштирок этишаётганди.

Шу боисдан ҳам ёшлар мураббийлари жамоа кўригида бўлган ва захирада ўйин амалиётисиз қолиб кетаётган футболчилар хизматидан фойдаланишди. «Қизилтоғ»да зарафшонликларга қарши кечган баҳсда Рустам Забиров шогирдлари 5:2 ҳисобида ғалаба қозонишди. Душанба куни «Бунёдкор» футбол мактаби майдонида «Нефтчи» ёшлари билан ўтган ўйинда фарғоналиклар 4:2 ҳисобида устун келишди.