«Фиорентина»нинг ўнг ҳимоячиси Додо билан шартномани узайтириш бўйича музокаралар тўхтаб қолди, деб ёзади CalcioNews24.
Клубнинг собиқ спорт директори Даниэле Праде 27 ёшли бразилиялик футболчининг 2027 йил 30 июнгача амал қилувчи шартномасини узайтириш ва унинг агентлари билан ҳамкорликни яхшилаш режасини ишлаб чиқишни бошлаганди.
Праде ноябрь ойи бошида кетганидан сўнг шартномани узайтириш жараёни секинлашди. «Фиорентина» 2029 йилгача янги шартнома имзолашни режалаштирган эди, унга яна бир йиллик узайтириш имконияти ҳам қўшилган, аммо Додони молиявий шартлар қониқтирмаяпти. Клуб маошни фақат 2027 йилдан бошлаб оширишни таклиф қилди, бу футболчига маъқул эмас. Ўз навбатида, «Фиорентина» музокараларни тўхтатишни бразилияликнинг агентларига тўланадиган юқори комиссиялар билан боғламоқда.
Додо 2022 йил июль ойида «Шахтёр»дан 15,4 миллион еврога Италия клубига ўтган.
