22 ёшгача бўлган футболчилар ўртасида Осиё чемпионати илк марта ташкил этилаётгани учун бугун бўлиб ўтадиган қуръа жараёнида терма жамоаларни саватчаларга бўлишда бундан 3 йил аввал бўлиб ўтган 19 ёшгача бўлган ёшлар ўртасидаги Осиё чемпонати натижалари инобатга олинади. Боиси, 3 йил аввалги мусобақада 1991 йил ва ундан кейин туғилган футболчилар иштирок этишган ва Уммонда бўладиган қитъа чемпионатида ҳам айнан ушбу футболчилар қатнашишади.

Хабарингиз бор, Марат Кабаев бошчилигидаги ёшлар терма жамоамиз Хитойнинг Зибо шаҳрида ўтган мусобақанинг чорак финалида чорак финалида Саудия Арабистони терма жамоасига 1:2 ҳисобида ютқазишганди (қўшимча бўлимларда). Ана шу натижа самараси ўлароқ, бугун терма жамоамиз 2-саватчадан қуръага тортилади.

Биринчи саватчада эса мезбонлар, юқорида ёдга олинган мусобақанинг финалчилари ва ярим финалда мағлуб бўлган жамоалардан бири жой олади. Хитойдаги мусобақа ярим финалида Жанубий Корея ва Саудия Арабистони терма жамоалари бир хил — 0:2 ҳисобида ютқазишгани боис, қайси жамоа айнан 1-саватчадан ўрин олиши ҳозирча номаълум (ОФК қуръа механизми ва саватчалар таркибини эълон қилмади). Балки, қуръа бошидан ушбу жамоаларнинг саватчалардаги ўрнини аниқлаш мақсадида мини-қуръа ўтказилар.

Ўзбекистон ўрин оладиган 2-саватчада Япония ва БАА терма жамоалари ҳам ўрин эгаллайди. Бу жамоалар билан бир гуруҳга тушмаслигимиз аниқ.

2010 йили ўтказилган қитъа чемпионатида иштирок этган 14та жамоа Уммонда бўладиган мусобақада ҳам иштирок этади. Фақат Мьянмар ва Кувайт терма жамоалари 3 йил аввалги турнирда қатнашишмаганди. Аксинча, Баҳрайн ва Вьетнам бу сафар ОЧда иштирок эта олмайдилар.

U22 Осиё чемпионатида иштирок этадиган терма жамоаларнинг рейтинги:
1. Уммон (мезбон)
2. КХДР
3. Австралия
4-5. Жанубий Корея
4-5. Саудия Арабистони
6. Япония
7. Ўзбекистон
8. БАА
9. Хитой
10. Сурия
11. Эрон
12. Иордания
13. Ироқ
14. Яман
15. Мьянмар
16. Кувайт