"Манчестер Сити" дарвозабони Жанлуижи Доннарумма жамоадоши Эрлинг Холанд ҳақида фикр билдирди.
Яқинда Италия ва Норвегия терма жамоалари ўртасидаги "скуадра адзурра"нинг йирик ҳисобдаги мағлубияти (1:4) билан якунланган ўйинда форвард италиялик футболчи дарвозасига дубль қайд этди.
"Эрлинг - ажойиб йигит. Жуда хотиржам, оиласи билан вақт ўтказишни яхши кўради. Биз дарҳол чиқишиб кетдик. Рақиб бўлсак ҳам, ўйинлардан кейин тез-тез гаплашиб турардик.
"Манчестер Сити"да мени ўз сафига қўшиб олиш имконияти пайдо бўлгач, Холанд менга хабар юборди. У трансферга фаол равишда чорлади, бунинг учун ундан миннатдорман. Яхшиямки, энди биз бир жамоадамиз, ахир унга қарши ўйнаш жуда қийин! Ҳақиқий ўзга сайёралик," - деди Доннарумма Sky Sports’га берган интервьюсида.
26 ёшли дарвозабон сентябрь ойи бошида "ПСЖ"дан "шаҳарликлар" сафига қўшилганди.
