Қозоғистоннинг "Актобе" клуби Европа лигаси саралашининг 3-босқичига йўлланмани қўлга киритди. Ўз майдонида Норвегия иккинчи лигаси вакили "Хёдд" клубини қабул қилган актобеликлар 2:0 ҳисобида ғалаба қозонишди. Хабарингиз бор, Норвегияда бўлиб ўтган дастлабки ўйинда майдон эгалари минимал ҳисобда қозоғистонликлардан устун келишганди.

Ўйиннинг 1-дақиқасидаёқ Александр Гейнрих деярли бирга-бир вазиятда дарвозани ишғол қила олмади — дарвозабон тўпни қайтариб қолди. Орадан 6 дақиқа ўтиб ўзбекистонлик ҳужумчининг узатмасидан кейин Сергей Давидов ҳимоячилар билан курашга киришди ва тўпни эгаллаб олиб, дарвозабонни ҳам алдаб, ҳисобни очди.

Биринчи бўлим якунига яқин Темур Кападзе Гейнрихнинг узатмасидан кейин дарвозабон билан яккама-якка вазиятга чиқиб борди ва кучли зарба йўллади. Бироқ норвегиялик дарвозабон тўпни қайтариб қолди.

Иккинчи бўлимнинг 61-дақиқасида яна ўша россиялик Давидов чап қанотдан етказиб берилган тўпни бош билан дарвозага буриб, ҳисобни 2:0га етказди. Ушбу голдан бироз вақт ўтиб, Кападзе ҳисобни 3:0га етказиш имкониятини қўлдан чиқарди. Темур юзма-юз вазиятда дарвозабонни алдаб ўтдию, аммо тўпни тўхтата олмади.

Ўйиннинг сўнгги 10 дақиқасида аввал Темур Кападзе, сўнгра Александр Гейнрих ўз ўрнини бошқа жамоадошларга бўшатиб беришди.

"Актобе" Европа лигасининг учинчи босқичида Исландиянинг «Брейдаблик» жамоаси билан куч синашади. Дастлабки ўйин 1 август куни Актобеда бўлиб ўтади.