Бир ҳафта муқаддам “Оқ-тепа” жамоасининг бош мураббийига айланган Александр Токов футболчилик фаолиятининг сўнгги йилларини айнан шу клубда ўтказган эди. Жамоа айни вақтда пойтахт вилоятининг тоғли ҳудудида бўлиб турибди. Биз клубнинг йиғинида бевосита иштирок этиб, Александр Султановичга бир нечта саволларимиз билан мурожаат қилдик.

— Бир неча кундан бери Бўстонлик туманинг Бурчмулла шаҳарчасида йиғин ўтказяпмиз. Йиғинда ёш футболчиларни кўздан кечириш билан бир қаторда уларнинг жисмоний тайёргарлигига алоҳида эътибор қаратганмиз. Клуб раҳбарияти бизга барча шароитларни яратиб бермоқда. Хусусан, жисмоний машғулотлардан сўнг ўйинчиларга керак бўладиган витаминлар, калорияли таомлар борасида муаммолар йўқ. Қолаверса, биз истиқомат қилаётган жойда бассейн, сауна бор. Бундан ташқари, шифокор ва фитнесс-инструктор ҳам футболчилар ихтиёрида. Қисқаси, иккинчи босқичга кўтаринки руҳда тайёргарлик кўряпмиз.

— Йиғинда янги футболчилар кўрикдан ўтяптими?
— Ҳа. Мазкур йиғинда уч нафар янги футболчини кўрикдан ўтказяпмиз. Маъруф Зокиржонов, Бобур Абдураҳмонов ва Илҳом Ражабовни клубда қолиш-қолмаслиги ҳақида ҳали аниқ бир фикр билдира олмайман. Боиси, Тошкентга қайтганимиздан сўнг бошқа ўйинчиларни ҳам кўрикдан ўтказамиз.

— Жисмоний тайёргарлик бўйича машғулотлар режасини ишлаб чиқишда қайсидир мутахассиснинг иш услубига таяндингизми?
— Йўқ. Футболчилик фаолиятимдаги тажрибам, интернетдаги маълумотлар асосида машғулотлар режаси тузиб чиқдим. Ҳозир шу асосида қўл остимдаги футболчиларни шуғуллантиряпман.

— Тоғли ҳудуддаги оғир жисмоний тайёргарликдан кейин чемпионат давомида футболчиларда чарчоқ сезилиб қолмасмикан?
— Ҳаммаси режа асосида кетмоқда. Тошкентга қайтганимиздан кейин футболчиларга чарчоқларини чиқаришлари учун бир неча кунлик дам берамиз. Сўнг яна машғулотларга киришамиз. Чемпионатнинг иккинчи қисми бошлангунига қадар бир нечта ўртоқлик учрашувлари ўтказишни ҳам режалаштирганмиз.