"Реал" вингери Винисиус Жуниор "Жирона" мухлисларига жамоаси қуйи лигага тушиб кетишини ишора қилди.
Ла Лиганинг 14-турида "Жирона" ва "Реал" жамоалари 1:1 ҳисобида дуранг ўйнади. Каталония жамоаси мухлислари рақибнинг бразилиялик футболчиси ҳар сафар тўпга текканида ҳуштакбозлик қилишди. Уларнинг баъзилари Винисиус ҳакамга шикоят қилганида йиғлаганини тасвирлашди.
Movistar Plus’нинг El Día Después дастурида мадридликлар футболчиси "Жирона" мухлисларига жавоб қайтаргани акс этган кадрлар намойиш этилди: у рақиб жамоа Сегундага тушиб кетишини имо-ишора билан кўрсатди ва истеҳзоли жилмайди.
"Реал" Испания чемпионатининг 14-туридан кейин 33 очко билан турнир жадвалида 2-ўринни эгаллаб турибди. "Жирона" 12 очко билан 18-ўринда бормоқда.













