“Барселона”дан “Монако” клубига ижарага берилган ҳужумчи Ансу Фати Францияни кутилганидан эртароқ тарк этиши мумкин. 23 ёшли футболчи Франция чемпионатида барқарорликка эришаётгандек туюлган паллада яна саломатлик билан боғлиқ муаммоларга дуч келди ва бу ҳолат унинг келажагини яна ноаниқ ҳолга солиб қўйди.

Ансу Фатининг “Монако”даги фаолияти муваффақиятли бошланган эди. У барча мусобақалар доирасида 14 учрашувда 6 та гол уриб, ўйин ритми, ўзига бўлган ишонч ва спорт формасини аста-секин тиклаётганди. Бироқ навбатдаги жисмоний ноқулайликлар унинг ривожланиш жараёнини тўхтатди. Шу сабабли “Монако” раҳбариятида футболчини мавсум охиригача сақлаб қолиш борасида жиддий саволлар пайдо бўлди.

Франция нашрларининг хабар беришича, “Монако” клуби ижара шартномасини муддатидан аввал бекор қилиш ва футболчини “Барселона”га қайтариш имкониятини кўриб чиқмоқда. Бу қарор Ансу Фати учун яна бир руҳий зарба бўлиши мумкин, “Барселона” эса футболчи бўйича янги ечим излашга мажбур бўлади. Мураббийлар штаби унинг истеъдодини юқори баҳоласа-да, тез-тез такрорланаётган жароҳатлар жамоа режаларига жиддий халақит бермоқда.

Амбицияли мавсумни ўтказаётган “Монако”га эса доимий равишда майдонга тушишга тайёр ва ишончли футболчилар зарур. Агар Ансу Фати “Барселона”га қайца, каталонияликлар уни яна ижарага бериш вариантларини кўриб чиқади.

Хабарларга кўра, “Эльче” унинг эҳтимолий манзили сифатида тилга олинмоқда. Ушбу клуб мураббийи Эдер Сарабия футболчини яхши билади ва унга камроқ босим остида, етакчи рол берилган муҳитда ўзини қайта топиш имкониятини яратишни истамоқда.

“Ансу Фатининг келажаги аввалгидек саломатлигига бевосита боғлиқ. Унинг истеъдоди шубҳасиз, бироқ жароҳатлар яна ҳал қилувчи омилга айланмоқда. Яқин ҳафталар ҳужумчининг фаолиятида навбатдаги бурилиш нуқтаси бўлиши мумкин”, дейилади хабарда.