Хабарингиз бор, «Андижон» жамоаси биринчи босқични муваффақиятли ўтказиб «Шарқ» минтақасида пешқадамликни қўлга киритди. Ушбу муваффақиятда майдонга тушган барча футболчиларнинг ўзига яраша ҳиссаси бор. Клуб расмий сайти орқали мухлислар ўртасида ойнинг энг яхши ўйинчисини аниқлаб борасида сўров ўтказиб келинаётганди. Бугун мураббийлар штаби сўров ўтказиб биринчи босқичда ўзини кўрсатган энг яхши уч нафар футболчини аниқлади.

Бунга кўра, иқтидорли ярим ҳимоячи Баҳром Абдураҳимов 1-ўринни эгаллади. Биринчи босқич баҳсларининг барчасида Абдураҳимов барқарор ўйин намойиш этди. Қолаверса, у рақиблар дарвозасига 6та тўп киритиб «Андижон»нинг ғалабаларига муносиб ҳисса қўшди. 2-ўринга Даврон Турсунов лойиқ топилди. У ҳимоя чизиғида ишончли ўйин кўрсатишдан ташқари ўз ҳисобига 6та гол ёзиб қўйишга ҳам муваффақ бўлди. Марказий ҳимоячи бўлишига қарамай Турсунов сермаҳсул ўйин намойиш этди. 3-ўринни Асқар Жадигеров эгаллади.

Таъкидлаш жоизки, тажрибали бу футболчи жароҳатдан кейин «Андижон» сафига қўшилганди. Шунга қарамай, Жадигеров биринчи босқич баҳслари давомида яхши формага кира олди. Айниқса, сўнгги учрашувларда у жамоанинг етакчи ўйинчиси бўла олди. Иккинчи босқичда мураббийлар ва мухлислар Жадигеровдан янада мазмунли ўйинлар кутишмоқда.

Шуни айтиб ўтиш керакки, мана шу учала футболчи ўз чизиқларида энг яхши ўйинчилар деб эътироф этилишди. Турсунов ҳимояда, Абдураҳимов ярим ҳимояда ва Жадигеров олдинги чизиқда фаол тўп суришди.