Аргентина терма жамоаси сардори Лионель Месси жаҳон чемпионатлари тарихида фақат учинчи марта кузатилган ноёб ҳужумкор натижани такрорлади.

OptaJoe статистика портали маълумотига кўра, Месси (бундай статистика юритила бошланган 1966 йилдан буён) битта жаҳон чемпионати плей-оффида 15 ёки ундан ортиқ голли вазият яратган ҳамда 15 ёки ундан ортиқ зарба йўллаган футболчилар қаторига кирди. Бунгача бундай натижага фақат аргентиналик афсона Диего Марадона 1986 йилги мундиалда (22 та зарба, 16 та голли вазият) ва германиялик Андреас Бреме 1990 йилги мундиалда (17 та зарба, 15 та голли вазият) эришган эди.

Месси эса жорий жаҳон чемпионати плей-оффидаги учта ўйинда 18 та зарба бериб, 15 та голли имконият яратди.

ЖЧ–2026 ярим финалида Аргентина 15 июль куни Англияга қарши баҳс олиб боради.

Ҳозирга қадар Лионель Месси турнирда 6 та ўйин ўтказиб, 8 та гол урди ва 1 та голли узатмани амалга оширди. Мусобақа давомида у терма жамоалар ўртасидаги энг нуфузли турнир тарихида энг яхши тўпурар ва энг яхши ассистентга айланди.